அம்பலமானது ‎ம.ம.க.வின் ‎சமுதாய துரோகம்! ‎

செய்தி வெளியிடப்பட்ட நாள் Wednesday, June 27, 2012, 21:54

தலைமைகழக செய்தி >> முக்கியச் செய்திகள்

‎1349 ஒப்பந்தப் பயிற்சி மருத்துவர்கள் கலந்தாய்வுக்காக ‎அழைக்கப்பட்டதில் ஒரு முஸ்லிமைக் கூட அழைக்காத தமிழக ‎அரசின் பச்சைத் துரோகத்தைக் கண்டித்து தமிழ்நாடு தவ்ஹீத் ஜமாஅத் ‎மாபெரும் முற்றுகைப் போராட்டத்தைக் கடந்த 14.06.12 அன்று ‎நடத்தியது.‎

சென்னையைக் கிடுகிடுக்க வைத்து, ஆட்சியாளர்களை அரள வைத்த ‎இந்தப் போராட்டத்தின் வாயிலாக அதிர்ந்து போயுள்ளது தமிழக அரசு. ‎தமிழக அரசின் துரோகத்தை வெளிக்கொண்டு வந்த தவ்ஹீத் ‎ஜமாஅத்தின் போராட்டத்தைத் தொடர்ந்து முஸ்லிம்கள் மத்தியில் ‎கடும் கொந்தளிப்பு ஏற்பட்டுள்ளது. ‎

இந்தப் போராட்டத்தின் வீரியத்தை அனைத்து மீடியாக்களும், ‎உளவுத்துறையும் தமிழக அரசின் கவனத்திற்குக் கொண்டு சென்றதன் ‎விளைவாக ஆளுங்கட்சி விழிபிதுங்க, சம்பந்தப்பட்ட மருத்துவர் ‎தேர்வாணையத்திற்கு பிரஷர் மேல் பிரஷர் பறக்க, நாமும் இது குறித்து ‎வேலைவாய்ப்பு அலுவலகத்தையும், மருத்துவர் தேர்வாணையத்தையும் ‎உணர்வு வார இதழ் சார்பாக தொடர்பு கொண்டோம்.‎

சென்னை சாந்தோமில் உள்ள அரசு வேலைவாய்ப்பு பதிவு ‎அலுவலகத்தின் இணை இயக்குநர் அவர்களைச் சந்தித்து ஒப்பந்தப் ‎பயிற்சி மருத்துவர்கள் நியமனத்திற்காக அழைக்கப்பட்ட 1349 பேர்களில் ‎ஒரு முஸ்லிம் கூட அழைக்கப்படாததற்கான காரணம் என்ன என்று ‎கேட்கப்பட்டது.‎

முஸ்லிம்களுடைய பட்டியலை அவர்கள் கேட்காததால் நாங்கள் ‎வழங்கவில்லை:‎

அதற்கு பதிலளித்த அரசு வேலைவாய்ப்பு பதிவு அலுவலகத்தின் ‎இணை இயக்குநர் அவர்கள், துறைவாரியாக ஆட்களை அரசு ‎வேலைவாய்ப்புகளில் நியமிக்கும் போது அந்தந்த சமுதாயத்தின் ‎இடஒதுக்கீட்டின் அளவுப் பிரகாரம் நியமிப்பது எங்களது பணி அல்ல ‎என்றும், முஸ்லிம்கள் மற்றும் பிற்படுத்தப்பட்டோர், மிகவும் ‎பிற்படுத்தப்பட்டோர் பட்டியல் என்று எங்களிடத்தில் இன்ன இன்ன ‎பிரிவுகளில் இத்தனை இத்தனை ஆட்கள் தேவை என்று சம்பந்தப்பட்ட ‎துறையிலிருந்து கோரிக்கை விடுப்பார்கள். அவர்களது கோரிக்கை ‎அடிப்படையிலும், அவர்கள் கேட்கும் எண்ணிக்கையின் ‎அடிப்படையிலும்தான் நாங்கள் அரசு தேர்வாணையத்திற்கோ, ‎மருத்துவர் தேவாணையத்திற்கோ அல்லது இது போன்ற அரசு ‎தரப்பில் வேலைக்கு ஆட்களை நியமிக்கும் துறைக்கோதீ பட்டியலை ‎வழங்குவோம் என்றும், எங்களிடம் மருத்துவர் தேர்வாணையம் ‎முஸ்லிம்களுடைய பட்டியலைக் கேட்காததால் அதை நாங்கள் ‎வழங்கவில்லை என்றும் தெரிவித்துள்ளார்.‎

வேலைவாய்ப்பு பதிவு அலுவலகம் பட்டியல் தராததால் நாங்கள் ‎முஸ்லிம்களை அழைக்கவில்லை:‎

அரசு வேலைவாய்ப்பு பதிவு அலுவலகத்தின் இணை இயக்குநர் ‎அவர்கள் கூறிய செய்திகளைச் சேகரித்த பிறகு, அதைத் தொடர்ந்து, ‎மருத்துவ தேர்வாணைய இயக்குனரான பொற்கைபாண்டியன் ‎அவர்களை உணர்வு வார இதழ் சார்பாக நமது செய்தியாளர் சந்தித்தார். ‎அவரிடத்தில் 1349 பேர்களில் ஒரு முஸ்லிம் கூட இல்லாததற்கு ‎விளக்கம் கேட்ட போது, கடைசியாக கவுன்சிலிங் நடந்த தேதியான ‎மார்ச் 26 மற்றும் 27ஆகிய தேதிகளில் கவுன்சிலிங்கிற்கு ‎அழைக்கப்பட்ட பட்டியலில் ஒரு முஸ்லிம் கூட இடம் பெறாததற்கு ‎உரியகாரணம், அரசு வேலைவாய்ப்பு பதிவு அலுவலகத்திலிருந்து மூப்பு ‎அடிப்படையில் பதிவு செய்த முஸ்லிம்களின் பட்டியல் எங்களுக்கு ‎வந்து சேரவில்லை என்பதுதான்.

அதுதான் மார்ச் 26 மற்றும் 27 ஆகிய ‎தேதிகளில் அழைக்கப்பட்டவர்களது பட்டியலில் முஸ்லிம்கள் யாரும் ‎இல்லாமல் போனதற்குக் காரணம் என்று பதில் கூறியுள்ளார். ‎

மேலும், முஸ்லிம்களின் மூப்பு பட்டியல் கலந்தாய்வு நடக்கும் ‎அன்றைய தினம்தான் மருத்துவ தேர்வாணையத்தின் கைக்குக் ‎கிடைத்ததால், அவற்றை 1349பேர் கொண்ட பட்டியலில் சேர்க்க ‎இயலவில்லை. இருப்பினும், அவற்றைச் சரி செய்து ஏறத்தாழ 50க்கும் ‎மேற்பட்ட முஸ்லிம்கள் அடங்கிய கலந்தாய்வு ஒன்றுக்கு ஏற்பாடு ‎செய்யப்பட்டுள்ளது.

அதன் நகலை உங்களுக்குத் தருகிறேன் என்றும் ‎மருத்துவ தேர்வாணைய இயக்குனரான பொற்கை பாண்டியன் ‎நம்மிடம் கூறினார்.‎

நமது செய்தியாளர் முன்னிலையிலேயே அதன் நகல் ஒன்றை இந்தப் ‎பத்திரிகையாளருக்கு கொடுங்கள் என்று கூறிய மறுகணமே அந்தப் ‎பட்டியல் தற்போது உங்களுக்குத் தரப்படமாட்டாது என்று ‎அந்தர்பல்டியும் அடித்துள்ளனர்.‎

மருத்துவத் தேர்வாணைய இயக்குனரான பொற்கை பாண்டியன் ‎அவர்களது வாக்குமூலத்தின் வாயிலாக முஸ்லிம்களுக்கு அவர்களது ‎பிரதிநிதித்துவத்திற்கு ஏற்ப இடஒதுக்கீடு வழங்கப்படாமல் துரோகம் ‎இழைக்கப்பட்டது உறுதி செய்யப்பட்டது.

தாங்கள் செய்த துரோகத்தை ‎சரி செய்ய 50 முஸ்லிம்கள் அடங்கிய புதிய பட்டியல் தயார் ‎நிலையில் உள்ளது என்றும் அவர் கூறியிருப்பது அதை மேலும் ‎உறுதிப்படுத்தியது.‎ ‎ ஆனால் கடைசி வரைக்கும் அந்த ‎முஸ்லிம்களின் பட்டியலை நம்மிடம் தர மறுத்து விட்டனர்.‎

முஸ்லிம்களுக்கான இடஒதுக்கீட்டை வழங்காமல் திட்டமிட்டு ‎சதிசெய்து விட்டு, தமிழ்நாடு தவ்ஹீத் ஜமாஅத் தனது போராட்டத்தின் ‎வாயிலாக தமிழகத்தைப் புரட்டிப் போட்டவுடன், தங்களது இந்த ‎துரோகத்தை மறைக்க தற்போது சப்பைக்கட்டு காரணங்களைக் கூறி ‎வருவது இதன் வாயிலாக அம்பலமாகியுள்ளது.‎

அம்மாவுக்கு ஆதரவாக களம் கண்ட ம.ம.கட்சி:‎

ஜால்ரா தட்டுவதற்கென்றே அதிமுகவின் சிறுபான்மைப் பிரிவாக மாறி ‎அம்மாவுக்கு அடிமைச் சேவகம் செய்து வரும் ம.ம.கட்சியினர் ‎வழக்கம் போல இந்த விஷயத்திலும் போட்டிபோட்டுக் கொண்டு ‎அம்மாவுக்கு ஆதரவாக, அம்மாவின் ஆசியைப் பெற வேண்டும் ‎என்பதற்காக ஜால்ரா தட்டி வருகின்றனர். ‎
‎

முதலில் எடுத்த எடுப்பிலேயே, 1349 பேரில் ஒரு முஸ்லிம் கூட ‎அழைக்கப்படாததற்கு காரணம், முஸ்லிம்கள் யாரும் ‎விண்ணப்பித்திருக்கமாட்டார்கள் என்று போலிக் காரணம் கூறினர். ‎அவர்களது முகத்திரையை ஆதாரங்களுடன் கிழித்தெறிந்தவுடன் மரம் ‎விட்டு மரம் தாவுவது போல முஸ்லிம்களுக்கு இழைக்கப்பட்ட ‎அநீதிக்கு எதிராக ம.ம.ம.வினர் கண்டன அறிக்கை விட்டனர்.‎
அந்தக் கண்டன அறிக்கையில் சுகாதாரத்துறை முஸ்லிம்களுக்கு ‎மாபெரும் துரோகம் செய்துள்ளதாகவும், அதை வன்மையாகக் ‎கண்டிப்பதாகவும் குறிப்பிடப்பட்டு இருந்தது. ‎

அந்த அறிக்கை இதோ: ‎

click image to enlarge

மருத்துவர்கள் நியமனத்தில் முஸ்லிம்கள் புறக்கணிப்பு – தமுமுக ‎கண்டனம்

தமிழ்நாடு முஸ்லிம் முன்னேற்றத் கழகத்தின் பொதுச் செயலாளர் ப. ‎அப்துல் சமது வெளியிடும் அறிக்கை:‎
தமிழகத்தில் சமீபத்தில் தேர்வு செய்யப்பட்ட 1349 மருத்துவர் ‎பணியிடங்களில் ஒரு மருத்துவரும் சிறுபான்மை முஸ்லிம் இனத்தை ‎சேர்ந்தவர் இல்லை எனத் தெரியவருகிறது. தமிழக அரசு ‎அறிவித்துள்ள 3.5 விழுக்காடு இடஒதுக்கீட்டின் அடிப்படையில் 1349 ‎மருத்துவர் பணியிடங்களில் 47 பணியிடங்கள் சிறுபான்மை முஸ்லிம் ‎இனத்தை சேர்ந்தவர்களுக்கு வழங்கப்பட்டிருக்க வேண்டும், மேலும் ‎பொதுப்பிரிவிலும் சிறுபான்மையின முஸ்லிம் இனத்தை சேர்ந்த ‎மருத்துவர்கள் ஒருவரும் தேர்வு செய்யப்படவில்லை. கடந்த ‎சட்டமன்ற தேர்தல் பிரச்சாரத்தில் முஸ்லிம்களுக்கான ‎இடஒதுக்கீட்டின் அளவு அதிகரிக்கப்படும் என அதிமுக பொதுச் ‎செயலாளரும் தற்போதைய முதல்வரும் அறிவித்தார்கள். ‎இந்நிலையில் மருத்துவர்கள் தேர்வில் இடஒதுக்கீடு பின்பற்றப்படாதது ‎மிகவும் வருத்தமளிப்பதுடன் திட்டமிட்டு முஸ்லிம்கள் ‎புறக்கணிக்கப்பட்டுள்ளனர் என தமிழ்நாடு முஸ்லிம் முன்னேற்றக் ‎கழகம் கருதுவதுடன் மக்கள் நல்வாழ்வுத் துறையின் இச்செயலை ‎தமிழ்நாடு முஸ்லிம் முன்னேற்ற கழகம் வன்மையாக கண்டிக்கிறது.‎
தமிழக முதல்வர் அவர்கள் இவ்விஷயத்தில் தலையிட்டு 3.5 ‎விழுக்காடு இடஒதுக்கீடு அடிப்படையில் மருத்துவர்களின் ‎பணியிடத்தை நிரப்ப வேண்டும் என தமிழ்நாடு முஸ்லிம் முன்னேற்ற ‎கழகம் வலியுறுத்துகிறது.‎
அன்புடன்
‎(ப. அப்துல் சமது)‎

இந்த அறிக்கையைப் பார்த்தவுடன் தமுமுகவில் இன்னும் மிச்சமாக ‎உள்ள உணர்வாளர்கள் நீண்ட காலத்துக்குப் பின் மனமகிழ்ச்சி ‎அடைந்தனர்.

இப்போதாவது ஜால்ராக் கட்சி என்ற பெயரை மாற்ற நம் ‎இயக்கம் முன் வந்து துணிவாகக் கண்டித்துள்ளதே என்று அவர்கள் ‎சந்தோஷப்பட்டுக் கொண்டார்கள்.

ஆனால் அந்த சந்தோஷம் ஒரு நாள் ‎கூட நீடிக்கவில்லை.‎

ஆம்! அந்த அறிக்கை தமுமுக இணையதளத்தில் இருந்து வந்த ‎வேகத்தில் காணாமல் போனது.‎

காரணம், அந்த அறிக்கையை தமுமுக பொதுச் செயலாளர் ‎வெளியிட்டபோது “அகில உலக ஜால்ராக்களின் தலைவர்” என்ற ‎பட்டத்தை வெல்வதற்காக போராடும் ஜவாஹிருல்லா இந்தியத் ‎திருநாட்டில் இல்லை.

இந்தக் கண்டன அறிக்கையைப் பார்த்து ‎கொதித்துப் போன ஜால்ரா புகழ் ஜவாஹிருல்லா, “என்னடா இது ஒரு ‎வருடமாக கூழைக்கும்பிடு போட்டு அம்மாவின் மனதில் நான் ‎இடம்பிடிக்க பட்டபாடு எனக்கல்லவா தெரியும். ஒரே நாளில் அதை ‎நாசமாக்கி விட்டீர்களே!” என்று பொம்மை பொதுச் செயலாளருக்கு ‎டோஸ் விட்டு அந்த அறிக்கையை நீக்கி விட்டு தனது ‎அறிவுப்பூர்வமான(?) அறிக்கையை வெளியிட்டு ஆள்வோரைக் குளிர ‎வைத்துள்ளார்.‎

அந்தர்பல்டி அடித்த ம.ம.கட்சியினர் :‎

இடஒதுக்கீட்டின் அடிப்படையில் முஸ்லிம்களுக்கு சரியான அளவில் ‎இடங்கள் ஒதுக்கப்பட்டுள்ளதாம்:‎

இழைக்கப்பட்ட துரோகத்திற்கு எதிராக தவ்ஹீத் ஜமாஅத் ‎போராட்டத்தை அறிவித்தவுடன் அரசியல் ஆதாயத்திற்காக கண்டன ‎அறிக்கை  வெளியிட்ட ம.ம.கட்சியினர், அதன் பிறகு ஆளும்கட்சியின் ‎பேரத்திற்கு அடிபணிந்து அவர்களுக்கு கூஜா தூக்கி நாரப் பிழைப்பு ‎நடத்தும் தொழிலை ஆரம்பித்தனர்.‎

எலும்புத் துண்டுகளுக்காக அலையும் நாய்களைப் போல, ஜெயலலிதா ‎உண்டது போக தனது கையில் வைத்துள்ள “வாரியப்பதவி” என்ற ஒரு ‎எலும்புத் துண்டுக்காக அதைப் பெற்றே தீருவது என்ற நப்பாசையில் ‎அந்த சின்னஞ்சிறு எலும்புத் துண்டுக்காகத்தான் இவர்கள் இந்த ‎அளவிற்கு அம்மாவிற்கு வாலை ஆட்டிக் கொண்டு இருக்கின்றார்கள்.‎
இடஒதுக்கீடு விஷயத்தில் முஸ்லிம்களுக்கு இழைக்கப்பட்ட துரோகம் ‎திட்டமிட்ட சதி என்று அறிக்கை வெளியிட்ட ம.ம.கட்சியினருக்கு, ‎அதிமுகவிடத்தில் பேரம் பேசி அந்த பேரம் படிந்தவுடனேயே அந்த ‎திட்டமிட்ட சதி என்ற குற்றச்சாட்டு அதோ கதி ஆகிவிட்டது.‎

ஆம்! திட்டமிட்ட சதி செய்துள்ளதாக குற்றம்சாட்டிய இரண்டு ‎நாளிலேயே தமிழக அரசு முஸ்லிம்களுக்கு எந்த துரோகமும் ‎செய்யவில்லை என்று அந்த துரோகத்தை மறைக்க திட்டம் தீட்டி ‎முஸ்லிம் சமுதாயத்திற்கு பச்சைத் துரோகத்தைச் செய்து தாங்கள் ‎சமுதாய துரோகிகள்தான் என்பதைத் தெள்ளத் தெளிவாக அடையாளம் ‎காட்டியுள்ளனர் இந்த ம.ம.கட்சியினர்.‎

தமிழக அரசு எந்த துரோகமும் செய்யவில்லை என்ற ரீதியில் ஒரு ‎அறிக்கை ம.ம.கட்சியின் சார்பாக வெளியிடப்பட்டது.‎

அப்படியானால், ‎

• இதற்கு முன்னர் அப்துல் சமது அவர்கள் பெயரில் கண்டித்து ‎அறிக்கை வெளியிட்டார்களே! ‎
• திட்டமிட்ட சதி என்று சொன்னார்களே!‎
• தமுமுக வன்மையாகக் கண்டிப்பதாகச் சொன்னார்களே!‎
• இதில் முஸ்லிம்கள் புறக்கணிக்கப்பட்டிருப்பது தங்களுக்கு ‎வருத்தமளிப்பதாக சொன்னார்களே!‎
அதுவெல்லாம் என்னவாயிற்று; அந்த  கண்டன  அறிக்கை ‎என்னவாயிற்று  என்று கேட்கின்றீர்களா? அது அம்பேலாகிவிட்டது.‎

மூத்த(ரத்) தலைவரின் அறிக்கை வெளியிடப்பட்டதும் ம.ம.கவின் ‎பொதுச் செயலாளர் அப்துல் சமது அவர்களின் கண்டன அறிக்கை ‎காணாமல் போய்விட்டது!‎

காணவில்லை ஐயா காணவில்லை ம.ம.கட்சியின் கண்டன ‎அறிக்கையை காணவில்லை:‎

தற்போது ம.ம.கட்சி முதலில் வெளியிட்ட அந்தக் கண்டன அறிக்கை ‎காணாமல் போய்விட்டது. அந்த அறிக்கையை கண்டுபிடித்துத் ‎தருபவர்களுக்கு தக்க சன்மானம் வழங்கப்படும் என்ற அறிவிப்போடு ‎ஈமெயில்கள் பறந்த வண்ணம் உள்ளன.‎

வழக்கம் போல தங்களது இணையதளத்திலிருந்து அந்த அறிக்கையை ‎தூக்கிவிட்டனர் இந்த துரோகிகள்.‎

பைலாவையே தூக்கியவர்களுக்கு இதெல்லாம் எம்மாத்திரம் :‎

இதற்கு முன்பாக ம.ம.கட்சி அரசியலில் போட்டியிடும் முடிவை எடுத்த ‎போது, அரசியல் கட்சியில் பதவி வகித்தால் தமுமுகவில் உள்ள ‎பொறுப்பு தானாக ரத்தாகிவிடும். அது செல்லுபடியாகாது என்ற ‎தமுமுகவின் பைலாவை மேற்கோள்காட்டி சகோதரர் பீஜே அவர்கள் ‎பொதுக்கூட்டம் ஒன்றில் உரையாற்றினார்.

அந்தப் பொதுக்கூட்டத்தில் ‎உங்களது இயக்கத்தின் உறுப்பினர்களை வைத்தே உங்களது ‎பைலாவின் அடிப்படையில் நீங்கள் வகிக்கும் இந்தப் பதவி செல்லாது ‎என்று வழக்குத் தொடுப்பேன் என்று பீஜே சொன்ன மறுநாள் ‎அவர்களது இணையதளத்திலிருந்து தமுமுகவின் பைலாவையே ‎தூக்கிவிட்ட புண்ணியவான்கள்(?) தானே இவர்கள்.‎

தங்களது பதவி சுகத்திற்காக இயக்கத்தின் பைலாவையே தூக்கி வீசிய ‎இந்த நயவஞ்சகர்களுக்கு, இந்தக் கண்டன அறிக்கையை தூக்கி ‎எறிவதெல்லாம் சும்மா ஜுஜுபி மாதிரிதானே!.பைலாவையே தூக்கி ‎வீசிய எங்களுக்கு, இதெல்லாம் சர்வசாதரணமய்யா என்று ‎ம.ம.கட்சியினர் சொல்வது உங்களுக்குக் கேட்கின்றதா?‎

முட்டுக்கொடுப்பது எப்படி? :‎

இப்போது சமுதாய துரோகத்தை ஆதரிக்கும் சமுதாய துரோகிகளின் ‎அறிக்கையை வாசிப்போம்.‎

அம்மாவுக்கு முட்டுக் கொடுப்பதற்காக இது குறித்து ம.ம.கவின் ‎மூத்த(ரத்) தலைவர் ஜவாஹிருல்லாஹ் அவர்கள் வெளியிட்ட ‎அறிக்கை குறித்து வரிக்கு வரி நாம் இங்கு அலசுவோம்.‎

தமிழக அரசு மருத்துவர் நியமனத்தில் முஸ்லிம்களுக்கு பச்சை ‎துரோகம் செய்ததா? – பேராசிரியர் எம். எச். ஜவாஹிருல்லா எம்.எல்.ஏ. ‎விளக்கம் என்று ஆரம்பிக்கின்றது அந்த ஜால்ரா அறிக்கை.‎
‎

“தமிழ்நாடு அரசு சமீபத்தில் அரசு சார்ந்த மருத்துவமனைகளில் ‎பணியாற்றுவதற்காக தற்காலிகமாக நியமனம் செய்த மருத்துவர்களில் ‎ஒருவர் கூட முஸ்லிம் இல்லை என்று முதலில் முஸ்லிம் லீக் ‎தலைவர் பேராசிரியர் கே.எம். காதர் மைதீனும் அதன் பின்னர் ‎முன்னாள் முதலமைச்சர் மு. கருணாநிதி அவர்களும் அறிக்கை ‎வெளியிட்டனர்.

இவர்களை அடிபிசகாமல் பின்பற்றி சமுதாயத்தில் ‎பொய்யை மூலதனமாக கொண்டு இயங்கும் ஒரு தறுதலை அமைப்பு ‎போராட்டம் கூட நடத்தியது”

என்று கூறி தவ்ஹீத் ஜமாஅத்தின் ‎போராட்டத்தை இழிவுபடுத்தியுள்ளார் ஜால்ரா தலைவர்.‎

முஸ்லிம் லீக் தலைவர் காதர் மைதீனும், முன்னாள் முதல்வர் ‎கருணாநிதியும் சொன்ன செய்தியை உண்மை என்று நம்பி, அதை ‎ஆய்வு செய்யாமல் அப்படியே அடிபிசகாமல் அதையே சொல்லி ‎போராட்டம் நடத்தினோம் என்று குற்றச்சாட்டு சொல்லும் இந்த மூளை ‎வரண்ட வாத்தியாருக்கு மண்டையில் ஏதேனும் சரக்கு உள்ளதா? ‎அல்லது அது வெறும் வெற்றிடமாக உள்ளதா? என்பது நமக்குச் ‎சந்தேகமாக உள்ளது.‎

கே.எம். காதர் மைதீன் சொன்னது என்ன? :‎

நாம் மேற்கண்டவாறு சொல்லக் காரணம் என்னவெனில், முஸ்லிம் ‎லீக் தலைவர் பேராசிரியர் கே.எம். காதர் மைதீன் இது குறித்து ஒரு ‎தனியார் தொலைக்காட்சிக்கு அளித்த பேட்டியின்போது, “1349 பேர்களில் ‎ஒரு முஸ்லிம் கூட அழைக்கப்படவில்லை என்று குற்றச்சாட்டு ‎சொல்கின்றீர்களே! இந்தக் குற்றச்சாட்டை தாங்கள் ‎பத்திரிக்கையாளர்களிடத்தில் சொல்வதற்கு முன்னால் அதைத் தீர ‎விசாரித்தீர்களா? அதை ஊர்ஜிதம் செய்தீர்களா?” என்ற கேள்வியை ‎அவரிடத்தில் எழுப்பியபோது, “அதுவெல்லாம் எனக்குத் தெரியாது. 1349 ‎பேர்களில் ஒரு முஸ்லிம் கூட அழைக்கப்படவில்லை என்ற செய்தி ‎சமுதாயப் பெரியவர்கள் மூலமும், வேறு சிலர் மூலமும் ‎கேள்விப்பட்டேன். அதைத்தான் நான் சொன்னேன்” என்று கூறி தனது ‎அறியாமையை வெளிப்படுத்தியுள்ளார்.

நீதியின் குரல் என்ற பெயரில் ‎நடத்தப்பட்ட அந்த நிகழ்ச்சியில் ஜால்ரா தலைவரும் கலந்து ‎கொண்டார். அவர் காதுக்கு கேட்கும் வகையில் காதர் மைதீன் ‎மேற்கண்டவாறு தெரிவித்து விட்டார்.

தவ்ஹீத் ஜமாஅத் தக்க ‎ஆதாரங்களைத் திரட்டி வைத்துக் கொண்டுதான் களமிறங்கியது; இது ‎குறித்து எந்த விபரத்தையும் திரட்டிக் கொள்ளாத காதர் மைதீனைப் ‎பின்பற்றிப் போராடவில்லை என்பது ஜால்ரா தலைவர் ‎முன்னிலையில் நிரூபணமானது.‎

ஆனால் தமிழ்நாடு தவ்ஹீத் ஜமாஅத் இவர் சொன்னதை ‎நம்பிக்கொண்டு, குருட்டுத்தனமாக போராட்டத்தை நடத்தவில்லை. ‎மாறாக இதற்கு முன்பாக இந்த ஒப்பந்தப் பயிற்சி மருத்துவர் ‎பணியிடங்களுக்கு எத்தனை பேர் அழைக்கப்பட்டுள்ளார்கள். அதில் ‎எத்தனை பேர் முஸ்லிம்கள்?. அது போல இப்போது எத்தனை பேர் ‎அழைக்கப்பட்டுள்ளார்கள்.

அதில் எத்தனை பேர் முஸ்லிம்கள் என்பன ‎உள்ளிட்ட அனைத்து தகவல்களையும் கையில் வைத்துக் கொண்டும், ‎அதுமட்டுமல்லாமல், பணி மூப்பு அடிப்படையிலும், முஸ்லிம் என்ற ‎அடிப்படையிலும் முன்னதாகவே அழைக்கப்பட வேண்டிய முஸ்லிம் ‎சகோதரர்கள் திட்டமிட்டு புறக்கணிக்கப்பட்டதற்கான அனைத்து ‎ஆதாரங்களையும் கையில் திரட்டி வைத்துக் கொண்டும் தக்க ‎காரணத்தோடுதான் இந்தப் போராட்டத்தை தவ்ஹீத் ஜமாஅத் ‎நடத்தியது.‎

இவ்வளவு புள்ளிவிபரங்களையும் கையில் வைத்துக் கொண்டு ‎போரட்டம் நடத்தியதை அம்மாவிடத்தில் கிடைக்கும் எலும்புத் ‎துண்டுக்காக கொச்சைப்படுத்தும் வாத்தியாரின் இழிசெயலை ‎என்னவென்பது? ‎

தறுதலை அமைப்பு என்ற பட்டத்தை தனது அமைப்புக்கு “தானே” ‎சூட்டிக்கொண்ட “தானே” புயல் தலைவர்(?):‎
சரி! காதர் மைதீன் சொன்ன விஷயத்தை அப்படியே நம்பி அது ‎உண்மை என்று ஆய்வு செய்யாமல் தவ்ஹீத் ஜமாஅத் போராட்டம் ‎நடத்தி அது தறுதலை அமைப்பாக மாறிவிட்டதாக சொல்லும் ‎வாத்தியார் அவர்களே! நாங்கள் ஆய்வு செய்து ஆதாரங்களை ‎வைத்துக் கொண்டுதான் போராட்டம் நடத்தினோம் என்று ‎புள்ளிவிபரங்களுடனும், ஆதாரங்களுடனும் தெளிவுபடுத்தியுள்ளோம். ‎

ஆனால், நாங்கள் எந்தக் காரணத்திற்காக போராட்டம் நடத்தினோமோ ‎அதே காரணத்தைச் சொல்லி, இந்த விஷயத்தில் முஸ்லிம்கள் ‎திட்டமிட்டு புறக்கணிக்கப்பட்டுள்ளனர் என்று தமுமுக பொதுச் ‎செயலாளர் அறிக்கை வெளியிட்டது எப்படி? அதிலிருந்து, ஜால்ராவின் ‎சொல்பிரகாரம் ம.ம.கட்சிதான் தறுதலை அமைப்பு என்பது உறுதியாகி ‎விட்டதல்லவா?‎

உங்களது தரங்கெட்ட கட்சிக்கு தறுதலை அமைப்பு என்ற ‎பட்டத்தையும் நீங்கள் தற்போது சூட்டியுள்ளது மிக்க மகிழ்ச்சி!‎

அடுத்தபடியாக கூறுகெட்ட வாத்தியாரின் கூடுதல் விளக்கத்தை கீழே ‎காண்போம் : ‎

புதுக்கோட்டை சட்டமன்றத் தேர்தல் பிரச்சாரம் உச்சபட்ச நிலையில் ‎இருந்த நிலையில் கத்தாரில் இருந்த நானும் அ. அஸ்லம் பாஷாவும் ‎இது குறித்து மக்கள் நல்வாழ்வுத் துறை அமைச்சர் டாக்டர் விஜயிடம் ‎தொலைபேசியில்  தொடர்பு கொண்டு கேட்ட போது அப்படி இருக்க ‎வாய்ப்பில்லை என்று தெரிவித்ததுடன் சம்பந்தப்பட்ட துறையிடம் ‎விசாரித்து வந்ததும் தகவல் தருவதாகக் கூறினார்.

இதன் பிறகு ‎அமைச்சரே தொலைப்பேசியில் தொடர்பு கொண்டு தமிழக அரசின் ‎மருத்துவத் துறைக்கு 10A1 விதிமுறையின் படி ஜனவரி 20முதல் மார்ச் ‎‎27 வரை 688 மருத்துவர்கள் தற்காலிகமாக நியமனம் ‎செய்யப்பட்டதாகவும் இதில் பிற்படுத்தப்பட்ட முஸ்லிம்களுக்கான ‎இடஒதுக்கீட்டின் அடிப்படையில் 24மருத்துவர்களும் திறந்த ‎போட்டியில் (Open Competition) 28 மருத்துவர்களும் நியமனம் ‎செய்யப்பட்டதாகவும் தெரிவித்தார். இது குறித்து எழுத்துப் பூர்வமாக ‎தகவல் அளிக்கும் படி கேட்டுக் கொண்டோம்.‎
‎ ‎
புதுக்கோட்டையிலிருந்து சென்னை திரும்பியவுடன் தகவல் ‎அளிப்பதாக அமைச்சர் தெரிவித்தார்.‎

மக்கள் நல்வாழ்வுத் துறை அமைச்சர் சென்னை திரும்பிய பிறகு ‎அவரை தலைமைச் செயலகத்தில் தமிழ்நாடு முஸ்லிம் முன்னேற்றக் ‎கழகத்தின் மூத்த தலைவர் செ. ஹைதர் அலி, பொதுச் செயலாளர் ப. ‎அப்துல் சமது மற்றும் கல்வி வழிகாட்டித் துறையின் ‎ஒருங்கிணைப்பாளர் பேராசிரியர் எம்.எப். கான் ஆகியோர் சந்தித்தனர். ‎அப்போது அமைச்சர் 688மருத்துவர்களில் 52 மருத்துவர்கள் நியமனம் ‎செய்யப்பட்ட பட்டியலை வழங்கினார். அமைச்சர் அளித்த பட்டியலை ‎நாம் ஆய்வு செய்ததுடன் மருத்துவர் நியமன வாரியத்தின் ‎அதிகாரிகளுடன் பேராசிரியர் எம்.எப். கானும், மனிதநேய மக்கள் ‎கட்சியின் முன்னாள் தலைமை நிலையச் செயலாளர் திருவள்ளுர் ‎இஸ்மாயிலும் விளக்கம் கேட்டனர். பேராசிரியர் காதர் மைதீனும் ‎முன்னாள் முதலமைச்சர் கலைஞர் கருணாநிதியும் இவர்கள் ‎வெளியிட்ட அறிக்கையை நம்பி ஆய்வு செய்யாமல் முற்றுகைப் ‎போராட்டம் அறிவித்த ஜைனுல் ஆபிதீனும் விவரம் என்னவென்று ‎அறியாமல் விசாரணை எதுவும் செய்யாமல் செயல்பட்டுள்ளார்கள் ‎என்பதை அறிய முடிந்தது”‎

என்று தாங்கள் முஸ்லிம்களுக்குச் செய்த துரோகத்தை ‎மறைப்பதற்காக ஆளுங்கட்சியினர் எழுதிக் கொடுத்த அறிக்கையை ‎தனது பெயரில் வெளியிட்டு அடிமைச் சேவகம் செய்துள்ளார் தானே ‎புயல் புகழ் வாத்தியார்.‎

கேப்பையில் நெய்வடிகின்றது என்றால் கேட்பாருக்கு எங்கே போனது ‎அறிவு :‎

மேற்கண்டவாறு தமிழில் ஒரு பழமொழி கூறுவார்கள். அதைப் போல ‎ஜால்ரா புகழ் வாத்தியார் எதை வேண்டுமானாலும் சொல்லி ஜால்ரா ‎தட்டினால் அதை அனைத்தையும் தலையாட்டிக் கேட்டுக் ‎கொண்டிருக்க முஸ்லிம் சமுதாயம் ஒன்றும் ம.ம.கட்சியின் கலகக் ‎கண்(ணில்லாத)மணிகள் போன்றவர்கள் அல்ல.‎

ஜனவரி 20 முதல் மார்ச் 27 வரை 688 மருத்துவர்கள் தற்காலிகமாக ‎நியமனம் செய்யப்பட்டதாகவும் இதில் பிற்படுத்தப்பட்ட ‎முஸ்லிம்களுக்கான இடஒதுக்கீட்டின் அடிப்படையில் 24 ‎மருத்துவர்களும், திறந்த போட்டியில் 28 மருத்துவர்களும் நியமனம் ‎செய்யப்பட்டதாகவும், மக்கள் நல்வாழ்வு துறையின் இணையதளத்தில் ‎தற்காலிக மருத்துவர் நியமனத்திற்காக மார்ச் 26 மற்றும் 27ல் ‎கலந்தாலோசனைக்கு தேர்ந்தெடுக்கப்பட்ட பட்டியல் ‎வெளியிடப்பட்டிருந்தது. இதில் 1384 மருத்துவர்களின் பெயர்கள் ‎இடம்பெற்றிருந்தன.

இதில் ஒருவர் கூட முஸ்லிம் இல்லை. ஆனால் ‎இது நியமனம் பெற்றவர்களின் பட்டியல் இல்லை. கலந்தாய்விற்கான ‎பட்டியல்தான். இந்தப் பட்டியல் பல்வேறு கட்டங்களாக ஜனவரி முதல் ‎ஏழு கட்டங்களாக நடைபெற்று வந்த கலந்தாய்வில் கடைசி 2 ‎கட்டங்களுக்கான கலந்தாய்விற்காக அழைக்கப்பட்டவர்களின் பட்டியல். ‎அப்போது ஏன் முஸ்லிம்கள் ஒருவர் கூட இந்தப் பட்டியலில் இல்லை ‎என்றால் இந்த கடைசி 2 கட்ட கலந்தாய்வுக்கு முன்பாகவே முஸ்லிம் ‎மருத்துவர்கள் 52 பேர் நாம் முன்பே குறிப்பிட்டது போல் நியமனம் ‎செய்யப்பட்டு விட்டார்கள. ‎
இப்படி நாம் சொல்லும் போது இந்த 1384ல் முஸ்லிம்களுக்கு ‎இடஒதுக்கீடு இல்லையா என்ற கேள்வி எழும். இந்த 1384 பேரையும் ‎சேர்த்து கலந்தாய்வுக்காக 5856 மருத்துவர்கள் அழைக்கப்பட்டார்கள். ‎இவர்களில் 1963 மருத்துவர்கள் மட்டுமே 2012 ஜனவரி 20, 21, 22. 23 ‎மற்றும் மார்ச் 22, 26 மற்றும் 27 ஆகிய நாட்களில் நடைபெற்ற ‎கலந்தாய்வில் பங்கு கொண்டார்கள்.

இவர்களில் கலந்தாய்வுக்கு ‎மருத்துவர்கள் வரவழைக்கப்பட்டு அனுமதிக்கப்பட்ட 835 இடங்களுக்கு ‎‎688 பேர் நியமனம் செய்யப்பட்டார்கள் என்பதை மருத்துவத் துறை ‎நமக்கு விரிவாக பட்டியலை அளித்துள்ளது. அந்த பட்டியலின் சுருக்கம் ‎இதோ” என்று கூறி 52 முஸ்லிம்களின் பட்டியலை அம்மாவின் ‎அடிவருடும் அறிக்கையில் கூறி முஸ்லிம் சமுதாயத்தின் காதில் ‎பூசுற்றுகின்றது ஜவாஹிருல்லாஹ் என்ற சட்டமன்ற ஜனாஸா.‎

இந்த சட்டமன்ற ஜனாஸா சொல்லும் சங்கதி உண்மைதானா என்பதை ‎நாம் இப்போது அலசுவோம்.‎
மருத்துவர் தேர்வாணையம் மற்றும் தமிழக தேர்வாணையம் போன்ற ‎அனைத்து அரசு நிறுவனங்களும் தங்களது காலி இடப்பணி விபரங்கள் ‎மற்றும் அதற்கு தேர்வு செய்யப்படுவோருடைய பட்டியல்களைத் ‎தங்களது இணையதளத்தில் வெளியிடும். அதுதான் அதிகாரப்பூர்வ ‎அறிவிப்பாகக் கருதப்படும்.‎

பயிற்சி ஒப்பந்த மருத்துவர்களை நியமனம் செய்ய தமிழக அரசு ‎தேர்வாணையத்திடம் சிறப்பு அனுமதி பெற்ற, “மக்கள் நல்வாழ்வுத் ‎துறை”யின் இணையதளத்தில் இன்று வரை எந்தெந்த பணிகளுக்கு ‎எத்தனை பேர் அழைக்கப்பட்டுள்ளார்கள்; அந்தந்த குறிப்பிட்ட ‎பணிகளுக்கு எத்தனை பேர் நியமிக்கப்பட்டுள்ளார்கள் என்ற விபரம் ‎முழுமையாக வெளியிடப்பட்டுள்ளது. ‎

ஆனால், ஒப்பந்தப் பயிற்சி மருத்துவர் நியமனத்தில் இது வரை ‎எத்தனை நபர்கள் நியமனம் செய்யப்பட்டுள்ளார்கள் என்ற விபரம் ‎இதுவரை வெளியிடப்படவில்லை. அதில் அழைக்கப்பட்டிருந்த ‎பட்டியலின் அடிப்படையிலும், அதை ஆதாரமாக வைத்தும்தான் நாம் ‎மருத்துவ தேர்வாணைய இயக்குனரான பொற்கை பாண்டியன் ‎அவர்களைச் சந்தித்து முஸ்லிம்களுக்கு இப்படி துரோகம் ‎இழைக்கப்பட்டுள்ளதே என்று கேட்ட போது, செய்வதறியாது விழித்து, ‎தங்களது தரப்பில் தவறு நிகழ்ந்துள்ளதை ஒப்புக்கொள்ளாமல், ‎எங்களுக்கு அரசு வேலைவாய்ப்பு பதிவு அலுவலகம் முஸ்லிம்களின் ‎மூப்புப் பட்டியலை வழங்கவில்லை என்று கூறி அரசு வேலைவாய்ப்பு ‎பதிவு அலுவலகத்தின் மீது பழியைத் தூக்கிப் போட்டார். அப்படி ‎இருக்கையில் அம்மாவைப் பாதுகாக்க புதிய ஜோடிக்கப்பட்ட கணக்கை ‎வாத்தியார் வெளியிடுகின்றார். ‎

ஜால்ரா தலைவர் வெளியிட்ட அறிக்கையில் கட்டம் கட்டி வெளியிட்ட ‎விபரம், “மக்கள் நல்வாழ்வுத் துறை”யின் இணைய தளத்தில் ‎வெளியிடப்படவில்லை. அந்த ஜனாஸா குறிப்பிட்ட அந்தச் ‎செய்திக்கான எந்த ஆதாரத்தையும் காட்டாமல், அதற்கான ‎அரசாணையையும் காட்டாமல், தான்தோன்றித்தனமாக அவராக ஒரு ‎கட்டம் கட்டி, அதில் நம்பர்களைப் போட்டு வெளியிட்டுவிட்டு மக்களை ‎ஏமாற்றப் பார்க்கிறார்.‎

அவர் வெளியிட்ட பட்டியலில் உள்ள விபரங்கள் இதை எழுதும் ‎இன்றைய தேதி  வரை மக்கள் நல்வாழ்வுத் துறை”யின் ‎இணையதளத்தில் வெளியிடப்படவில்லை.‎
‎

“மக்கள் நல்வாழ்வுத் துறை”யின் இணையதளத்தில் ஜனவரி 20 முதல் ‎மார்ச் 27 வரை பயிற்சி ஒப்பந்த மருத்துவப்பணிக்காக அழைக்கப்பட்ட ‎மருத்துவர்களின் முழுப் பட்டியலும் இடம்பெற்றுள்ளது. அதை ‎அப்படியே தேதிவாரியாக கீழே தருகின்றோம். ‎
‎

“மக்கள் நல்வாழ்வு துறை”யின் இணையதளம் தரும் சரியான கணக்கு ‎இதோ கீழே: ‎
இதுதான் உண்மையான நல்லகணக்கு :‎
‎1. 20.01.2012 – ஆம் தேதி 191 பேர் அழைக்கப்பட்டுள்ளனர். (இது பொது ‎பிரிவு. இதை நாம் கணக்கில் கொள்ள தேவை இல்லை)‎
‎2. 23.01.2012 – ஆம் தேதி 924 பேர் அழைக்கப்பட்டுள்ளனர். ‎
‎3. 24.01.2012 – ஆம் தேதி 846 பேர் அழைக்கப்பட்டுள்ளனர். ‎
‎4. 25.01.2012 – ஆம் தேதி 668 பேர் அழைக்கப்பட்டுள்ளனர். ‎
அதாவது 23.01.2012 முதல் 25.01.2012 வரை மொத்தம் 2438 பேர் ‎அழைக்கப்பட்டுள்ளனர்.‎

ஜனவரி மாதம் நடத்தப்பட்ட இந்தக் கலந்தாய்வில் மொத்தம் ‎அழைக்கப்பட்ட 2438 பேரில் 88 பேர் முஸ்லிம்கள் இடம் பெற்று ‎இருந்தனர். 3.5 சதவிகிதம் இதில் முஸ்லிம்கள் அழைக்கப்பட்டுள்ளனர். ‎இதைக் குறை கூற முடியாது. ‎
ஆனால் மார்ச் மாதம் அழைக்கப்பட்ட பட்டியலில்தான் ஒரு முஸ்லிம் ‎கூட இல்லை. அந்தப் பட்டியல் விபரம்

இதுதான்.‎
‎5. 26.03.2012 – ஆம் தேதி 677 பேர் அழைக்கப்பட்டுள்ளனர். ‎
‎6. 27.03.2012 – ஆம் தேதி 672 பேர் அழைக்கப்பட்டுள்ளனர்.‎

இந்த இரண்டு நாட்களும் மொத்தம் 1349 பேர் அழைக்கப்பட்டுள்ளனர். ‎அதில் ஒருவர் கூட முஸ்லிம் இல்லை. ‎
கலந்தாய்வுக்கு ஒரு முஸ்லிமைக்கூட அழைக்காவிட்டால், பிறகு ‎எப்படி அவர்களுக்கு உரிய பிரதிநிதித்துவத்தை இவர்கள் ‎வழங்குவார்கள்?‎

இதுதான் நம்முடைய குற்றச் சாட்டு.இதை சம்பந்தப்பட்ட அரசு துறை ‎அதிகாரிகளே ஒப்புக்கொண்டால் கூட வாத்தியார் மட்டும் அதை விட்டு ‎வைப்பதாகத் தெரியவில்லை. இந்த இடத்தில்தான் இந்த சமுதாய ‎துரோகிகளின் உண்மை முகம் பளிச் சென்று வெளியில் தெரிகின்றது.‎
வாத்தியார் வெளியிட்ட கள்ளக்கணக்கு:‎

இந்த பட்டியலில்

அ.20-1-2012ல் 191 பேர் அழைக்கப்பட்டதாக குறிப்பிட்டுள்ளார். இது ‎மட்டும் உண்மை. இந்த விபரம் மக்கள் நல்வாழ்வுத்துறை ‎இணையதளத்தில் வெளியிடப்பட்டுள்ளது.‎
ஆ. 21-1-2012ல் 928 பேர் அழைக்கப்பட்டதாக ஜால்ரா புகழ் ‎ஜவாஹிருல்லா கூறுகிறார். ஆனால் இந்த தேதியில் எந்தக் ‎கலந்தாய்வும் நடந்ததாக சம்மந்தப்பட்ட இணைய தளத்தில் ‎குறிப்பிடப்படவில்லை.‎
‎

928பேர் அதில் அழைக்கப்பட்டதாகவும் குறிப்பிடப்படவில்லை. 191 பேர் ‎அழைக்கப்பட்டதை இணைய தளத்தில் வெளியிட்ட மக்கள் ‎நல்வாழ்வுத்துறை, இவ்வளவு எண்ணிக்கையில் நடந்த கலந்தாய்வை ‎எப்படி வெளியிடாமல் இருக்கும்? அரசின் அதிகாரப்பூர்வ அறிவிப்பில் ‎இல்லாத ஒரு தேதியையும், அந்த எண்ணிக்கையையும் அப்படியே ‎வெளியிட்டு மக்களை மூடர்களாக்க நினைத்துள்ளார் என்பது இதில் ‎இருந்து உறுதியாகின்றது. ‎

இ.22-1-2012ல் 846 பேர் அழைக்கப்பட்டதாக இவர் கட்டம் கட்டியுள்ளார். ‎ஆனால் இந்த தேதியில் எந்தக் கலந்தாய்வும் நடந்ததாகவோ, இந்த ‎எண்ணிக்கையில் உள்ளவர்களுக்கு அழைப்பு அனுப்பியதாகவோ எந்த ‎அறிவிப்பும் சம்மந்தப்பட்ட துறை சார்பில் அதிகாரப்பூர்வ இணைய ‎தளத்தில் சொல்லப்படவில்லை. இதற்கான எந்த ஆதாரத்தையும் ‎ஜால்ரா தலைவர் வெளியிடவில்லை.‎

ஈ. 23-1-2012ல் 807 பேர் அழைக்கப்பட்டதாக ஜால்ரா தலைவருக்கு வஹீ ‎வந்துள்ளது போலும். ஆனால் சம்மந்தப்பட்ட துறை மூலம் ‎வெளியிடப்பட்ட பட்டியலில் 924 பேர் என்று பெயர்களுடன் பட்டியல் ‎வெளியிடப்பட்டுள்ளது. எனவே இதுவும் தவறான தகவல்தான். ஜால்ரா ‎அடிப்பதற்காக இவருக்கு எழுதிக் கொடுத்த விபரத்தையும் ‎அதிகாரப்பூர்வமாக வெளியிடப்பட்ட பட்டியலுடன் ஒப்பிட்டுப் பார்க்க ‎வேண்டும் என்ற அறிவு கூட இல்லாமல் போய்விட்டதா?‎

என்னய்யா நீ தரும் விபரமும் அதிகாரப்பூர்வமாக வெளியிட்ட ‎விபரமும் ஒன்றுக் கொன்று முரண்படுகிறதே என்று கேட்கும் அறிவு ‎கூடவா இல்லாமல் போய் விட்டது? ‎

உ.22-3-2012ல் 1700 பேர் அழைக்கப்பட்டதாக ஜால்ரா மன்னன் ‎வெளியிட்டுள்ள செட்டப் பட்டியல் கூறுகிறது. ஆனால் அதிகாரப்பூர்வ ‎இணைய தளத்தில் இந்த தேதியில் 1700 பேர் அழைக்கப்பட்டதாக ‎கூறப்படவில்லை. வேறு தேதியிலும் இந்த எண்ணிக்கையில் ‎அழைக்கப்பட்டதாகக் கூறப்படவில்லை. இது ஆதாரமில்லாமல் ‎வெளியிட்ட செட்டப் செய்தியாகும்.‎

ஊ.26-3-2012ல் 687 பேர் அழைக்கப்பட்டதாக ஜால்ரா தலைவர் ‎கூறுகிறார். ஆனால் இணைய தளத்தில் 677 பேர் என்று பெயர் ‎பட்டியலுடன் உள்ளது. கூடுதலான அந்தப் பத்து பேர் யார் ‎என்பதையும், ஏன் அவர்கள் பெயர் விடுபட்டுள்ளது என்றும் திருப்பிக் ‎கேட்டு இருந்தால் இது ஜோடிக்கப்பட்டு நம்மிடம் தரப்படுகிறது என்று ‎ஜால்ரா மன்னனுக்குப் புரிந்திருக்கும்.‎

எ.27-3-2012ல் 697 பேர் அழைக்கப்பட்டதாக இந்த ஜனாஸா வெளியிட்ட ‎ஜால்ரா அறிக்கையில் கூறப்பட்டுள்ளது. ஆனால் அதிகாரப்பூர்வமான ‎அறிவிப்பில் 672 பேர் என்று உள்ளது. அந்தப் பட்டியலில் உள்ளதில் ‎மேலதிகமாக அழைக்கப்பட்டவர்கள் விபரம் என்ன? ஏன் அது குறித்து ‎இணைய தளத்தில் இல்லை? என்று கேள்வி கேட்டு இருந்தால், ‎‎”என்னமோ நடக்குது” என்று விளங்கி இருக்குமே? ‎

நாம் வெளியிட்ட அந்தப் பட்டியலை பெயர்களுடன் பார்க்க ‎விரும்புவோர் கீழ்க்காணும் லிங்கை கிளிக் செய்து அதிகாரப்பூர்வமான ‎மக்கள் நல்வாழ்வுத்துறை வெப்சைட்டில் காணலாம். அதனுடன் ‎ஒப்பிட்டுப்  பார்த்து ஜால்ரா தலைவரின் தரங்கெட்ட ‎அடிமைத்தனத்தையும் பார்க்கலாம்.‎

http://tnhealth.org/More.html

ஜனாஸாவிற்கு மட்டும் இந்தப்பட்டியல் தெரிந்தது எப்படி?:‎

அப்படியானால், அரசு தரப்பிலிருந்து பேரம் பேசி சரிகட்டப்பட்டுத்தான் ‎இந்தப் பட்டியல் வெளியிடப்பட்டுள்ளது என்பது கண்கூடு. ‎

இந்தக் கணக்கில் நடந்துவிட்ட துரோகத்தை மறைக்கத் தான் தற்போது ‎அவசர அவசரமாக 52 பேர் பட்டியலை தேர்வு செய்யப்பட்டவர்களது ‎பட்டியல் என்று போட்டு வெளியிட்டுள்ளனர். ஆனால் அதை ‎அதிகாரப்பூர்வ இணைய தளத்தில் வெளியிடவில்லை.‎

இது குறித்து பதில் சொல்லக் கடமைப்பட்ட மக்கள் நல்வாழ்வுத்துறை ‎ஜூன் 24 அன்று ஒரு அறிக்கை வெளியிட்டுள்ளது.‎

அந்த அறிக்கையே தமுமுகவின் கள்ளத்தனத்தை அம்பலப்படுத்தும் ‎வகையில் அமைந்துள்ளது.‎
அந்த அறிக்கை இது தான்:‎

தமிழக அரசின் பொது சுகாதாரம் மற்றும் நோய் தடுப்பு மருந்து துறை ‎இயக்குனர் வெளியிட்டுள்ள செய்தி குறிப்பில் கூறியிருப்பதாவது:- ‎

அரசு ஆரம்ப சுகாதார நிலையம், அரசு மருத்துவமனை, அரசு ‎மருத்துவக் கல்லூரி மருத்துவமனை மற்றும் அரசு தொழிலாளர் ‎ஈட்டுறுதி மருத்துவமனை ஆகியவற்றில் உள்ள மொத்தம் 835 ‎மருத்துவர் மற்றும் சிறப்பு மருத்துவர் காலிப் பணியிடங்கள் வேலை ‎வாய்ப்பகம் மூலம் பதிவு மூப்பு பட்டியல் பெறப்பட்டு நிரப்பிடுவதற்கு ‎‎2.1.12 அன்று ஆணை வெளியிடப்பட்டது. ‎

அவற்றுள் 682 எம்.பி.பி.எஸ். மருத்துவப் பணியிடங்கள் நிரப்பப்பட ‎வேண்டி வேலைவாய்ப்பு அலுவலகத்தின் மூலம் 1:5 விகிதாசாரப்படி ‎மருத்துவர்கள் பதிவு மூப்புப் பட்டியல் பெறப்பட்டது. அதில் இனச் ‎சுழற்சி முறைப்படி பிற்படுத்தப்பட்ட முஸ்லீம் வகுப்பைச் ‎சார்ந்தவர்களுக்குரிய ஒதுக்கீடு 24 ஆகும். ‎
முதற்கட்டமாக வேலைவாய்ப்பு அலுவலகத்தின் மூலம் 2448 ‎நபர்களின் பெயர்கள் பரிந்துரைக்கப்பட்டதில் 88 பிற்படுத்தப்பட்ட ‎முஸ்லீம் நபர்களின் பெயரும் அடங்கும். ‎
ஜனவரி 20 மற்றும் 23, 24, 25 ஆகிய தேதிகளில் பணி நியமன ‎கலந்தாய்வு நடத்திட திட்டமிட்டு 09.01.2012 அன்று அனைவருக்கும் ‎அழைப்புக் கடிதம் அனுப்பப்பட்டது. இணையதளத்திலும் பதிவு மூப்பு ‎அடிப்படையில் பட்டியல் வெளியிடப்பட்டது. ‎

அதனைத்தொடர்ந்து சில முஸ்லீம் சமுதாய மருத்துவர்கள் ‎இணையதளத்திலிருந்த பட்டியலிலுள்ள முஸ்லீம் நபர்களைவிட பதிவு ‎மூப்பு உடையவர்களாக இருந்தால் வேலைவாய்ப்பு அலுவலகத்தை ‎அணுகியதைத் தொடர்ந்து, 20.01.2012 அன்று பதிவு தேதியின்படி 122 ‎பிற்படுத்ப்பட்ட முஸ்லீம் சமுதாயத்தினர் தவறுதலாக விடுபட்டுள்ளது ‎என்று வேலைவாய்ப்பு அலுவலகத்திருந்து ஓர் பட்டியல் பெறப்பட்டது. ‎

அவ்வாறு வேலைவாய்ப்பு அலுவலகத்திலிருந்து பின்னர் வழங்கப்பட்ட ‎‎122 நபர்களும் ஏற்கனவே பரிந்துரைக்கப்பட்ட 88 நபர்களைக் காட்டிலும் ‎பதிவு தேதியின் அடிப்படையில் முதுநிலை பெற்றவர்கள் என்பதால் ‎தந்தி வாயிலாக கலந்தாய்வில் கலந்து கொள்ளுமாறும் ‎தெரிவிக்கப்பட்டது. ‎

ஜனவரி மாதம் நடைபெற்ற கலந்தாய்வின்போதே பிற்படுத்தப்பட்ட ‎முஸ்லீம் சமுதாயத்திற்கான ஒதுக்கப்பட்ட 24 காலி பணியிடங்களும் ‎நிரப்பப்பட்டு விட்டது. மேலும், பொதுப் பிரிவின் கீழ் வேலை வாய்ப்பக ‎அலுவலக பதிவு மூப்பு அடிப்படையில் 28 முஸ்லீம் ‎சமுதாயத்தினருக்கு பணி நியமனம் வழங்கப்பட்டுள்ளது. ‎

மேலும், பணிநியமனக் கலந்தாய்வில் கலந்து கொண்ட 33 ‎பிற்படுத்தப்பட்ட முஸ்லீம் சமுதாயத்தினர் (16.11.2010 முதல் 14.12.2011 ‎வரையிலான) பணியில் சேர தேர்வு செய்ததின் பேரில் ‎காத்திருப்போர் பட்டியல் பராமரிக்கப்பட்டு வருகிறது. ‎

இதற்கிடையே மீதமுள்ள 423 எம்.பி.பி.எஸ். காலி பணியிடங்களுக்கு ‎மீண்டும் வேலை வாய்ப்பு அலுவலகத்தின் மூலம் 1349 நபர்களின் ‎பட்டியல் பெறப்பட்டு இணைய தளத்தில் வெளியிடப்பட்டது. அதில் ‎பிற்ப்படுத்தப்பட்ட முஸ்லீம் சமுதாயத்தினரைவிட முந்தைய ‎தேதியில் (2008, 2009 மற்றும் 11/2010) பதிவு செய்த பிற சமுதாயத்தினர் ‎இடம் பெற்று இருந்தனர். ‎

காத்திருப்போர் பட்டியலில் வைக்கப்பட்டுள்ள பிற்படுத்தப்பட்ட ‎முஸ்லீம் மருத்துவர்கள் மேற்கூறிய 1349 நபர்களில் பட்டியலில் ‎இருந்தவர்களுக்குப் பிறகு பதிவு செய்தவராதலால் அவர்கள் ‎இப்பட்டியலில் இடம்பெறவில்லை. முதற்கட்ட பணிநியமன ‎கலந்தாய்விலேயே பிற்படுத்தப்பட்ட முஸ்லீம் சமுகத்தினருக்கான ‎இடஒதுக்கீடு (3.5 சதவீதம்) 24 நபர்கள் மற்றும் பொது பிரிவு 28 ‎நபர்களும் ஆக மொத்தம் 52 நபர்களுக்கு பணி நியமனம் ‎வழங்கப்பட்டுள்ளது. ‎

எனவே மார்ச் 26 மற்றும் 27 ஆகிய தேதிகளில் நடைபெற்ற பணி ‎நியமனக் கலந்தாய்வின்போது மற்ற சமுதாயத்தினரைச் சார்ந்தவரை ‎கொண்டு 371 காலிப் பணியிடங்கள் இனச் சுழற்சி அடிப்படையில் ‎நிரப்பப்பட்டது. தற்பொழுது இன்னமும் நிரப்பப்பட வேண்டிய காலிப் ‎பணியிடங்கள் 52 ஆகும். ‎

இவற்றை நிரப்ப மீண்டும் வேலை வாய்ப்பு அலுவலகம் மூலம் ‎பட்டியல் கோரப்பட உள்ளது. பெறப்படும் பட்டியலில் பதிவுத் தேதியின் ‎அடிப்படையில் காத்திருப்போர் பட்டியலில் உள்ள பிற்படுத்தப்பட்ட ‎முஸ்லீம் நபர்களை உரிய இடத்தில் பொருத்தி பணி நியமனம் ‎மேற்கொள்ளப்படும். ‎
இவ்வாறு அதில் கூறப்பட்டுள்ளது. ‎

மேற்கண்ட அறிக்கையை நன்றாகக் கவனித்து வாசியுங்கள்.‎

முரண் ஒன்று :‎

ஜனவரி மாதம் 2438 பேர் அழைக்கப்பட்டதில் முஸ்லிம்கள் 88 பேர் ‎இருந்ததாகவும் ஆனால் அவர்களை விட முன்னர் பதிவு செய்த 122 ‎பேர் விடுபட்டு இருந்தது பின்னர் தெரிய வந்ததாகவும் இதன் பின்னர் ‎தந்தி மூலம் அவர்களுக்கு அழைப்பு அனுப்பப்பட்டதாகவும் ‎கூறப்பட்டுள்ளது. அதாவது இவர்கள் அழைப்பு அனுப்பிய 88 பேரை ‎விட இவர்கள் அழைப்பு அனுப்பாத 122 பேர் முன்னரே பதிவு ‎செய்துள்ளனராம். ஒருவர் இருவர் என்றால் தவறுகள் நடப்பதை ‎ஒப்புக் கொள்ளலாம். 122 பேர் முன்னரே பதிவு செய்திருந்தும் ‎அவர்களை அழைக்காமல் விட்டு விட்டு அவர்களுக்குப் பின்னால் ‎பதிவு செய்த 88 பேரை அழைத்து விட்டோம் என்று சொல்வதை ‎மூளையுள்ள யாரும் நம்ப முடியுமா? ‎
முன்னால் பதிவு செய்த 122 முஸ்லிம்கள் விடுபட்டது போல் வேறு ‎சமுதாயத்தினரில் ஏன் ஒருவர் கூட இப்படி விடுபடக் காணோம். இந்த ‎விபரங்கள் கணினியில் பாதுகாக்கப்படுகின்றன. மனிதனுக்குத்தான் ‎மதவெறி இருக்கும் என்றால் முஸ்லிம்களில் மட்டும் ‎தகுதியானவர்கள் 122 பேரை புறக்கணிக்கும் அளவுக்கு ‎கம்ப்யூட்டருக்கும் மதவெறி வந்து விட்டதா? அந்த அளவுக்கு ‎கம்ப்யூட்டருக்கும் மதவெறியை ஊட்டியுள்ளார்களா? ‎
அரசின் இந்த அறிக்கை முஸ்லிம்களுக்கு துரோகம் செய்யப்பட்டதை ‎உறுதிப்படுத்தும் வகையில் உள்ளது. ‎

முரண் இரண்டு:‎

முதல் பாராவில் நியமிக்கப்பட வேண்டியவர்கள் 835 பேர் என்கிறது.‎
அதற்கு அடுத்த பாராவில் 682 பேர் நியமிக்கப்பட்டதாகவும் அதில் 3.5 ‎சதம் முஸ்லிம்களுக்கு 24 கொடுக்கப்பட்டதாகவும் கூறப்படுகிறது. ‎‎835ல் 682 போனால் மீதம் உள்ள இடங்கள் 153தான் இருக்கும்.‎
ஆனால் 9வது பாராவில் மீதமுள்ள 423 காலியிடங்கள் என்று இந்த ‎அறிக்கை கூறுகிறது.‎
‎835ல் 682 போனால் 423 வரும் என்பதில் இருந்து எதையோ செய்து ‎விட்டு மறைப்பதற்காக உளறுகிறார்கள் என்பது உறுதியாகின்றது. ‎
தமுமுகவின் கள்ளத்தனத்தை இதுவும் அம்பலப்படுத்துகிறது.‎

முரண் மூன்று:‎

ஏழாம் பாராவில் முஸ்லிம்களுக்கு கொடுக்க வேண்டிய 24 இடங்களும் ‎கொடுத்து முடிக்கப்பட்டு விட்டன என்று கூறப்படுகிறது. ஆனால் ‎கடைசி இரண்டு பாராக்களில் இன்னும் 52 இடங்கள் மீதம் உள்ளன. ‎முஸ்லிம்களுக்கு கிடைக்க வேண்டிய இடங்களை அதில் இருந்து ‎வழங்குவோம் என்று கூறப்படுகிறது. கொடுக்க வேண்டியதை ‎கொடுத்து விட்டது உண்மையா? அல்லது இனி மேல் கொடுப்பார்கள் ‎என்பது உண்மையா? ‎

முரண் நான்கு:‎

கடைசிக்கு முந்திய பாராவில் 371 இடங்கள் முஸ்லிமல்லாத ‎மக்களைக் கொண்டு நிரப்பப்பட்டதாக கூறப்படுகிறது. 371ல் ஒரு இடம் ‎கூட முஸ்லிமுக்கு வழங்கப்படவில்லை என்பதும் இனி மேல்தான் ‎நம்முடைய போராட்டத்துக்குப் பிறகுதான் நியமிக்கப்படுவார்கள் ‎என்றும் கூறி, ஜால்ரா தலைவர் கூறியது அப்பட்டமான பொய் என்று ‎மக்கள் நல்வாழ்வுத்துறை அம்பலப்படுத்தி விட்டது. ‎

முரண் ஐந்து:‎

கீழிருந்து ஐந்தாம் பாராவில், “காத்திருப்போர் பட்டியலில் ‎வைக்கப்பட்டுள்ள பிற்படுத்தப்பட்ட முஸ்லீம் மருத்துவர்கள் ‎மேற்கூறிய 1349 நபர்களில் பட்டியலில் இருந்தவர்களுக்கு பிறகு பதிவு ‎செய்தவராதலால் அவர்கள் இப்பட்டியலில் இடம்பெறவில்லை என்று ‎குறிப்பிட்டுள்ளனர். இதுவும் பொய்யாகும். ‎

உதாரணத்துக்கு நெல்லை ஹாஜா மைதீன் நவம்பர் 2011ல் பதிவு ‎செய்துள்ளார். இவருக்கு இடமளிக்காமல் இவருக்குபின் பதிவு செய்த ‎பாரதி ராஜனுக்கு (2012 ஜனவரியில் பதிவு செய்தவர்) அழைக்கப்பட்டது ‎எப்படி? முஸ்லிம்கள் முன்னரே பதிவு செய்யவில்லை என்பது ‎உண்மையானால் 2012ல் பதிவு செய்தவரை அழைத்து 2011ல் பதிவு ‎செய்தவரை விட்டது பச்சைத் துரோகம் இல்லாமல் வேறு என்ன? ‎

முரண் ஆறு: ‎

காலிப்பணியிடங்கள் இன்னும் 147 உள்ளதாக ஜால்ரா தலைவர் ‎சொல்கிறார். ஆனால் மேற்கண்ட அறிக்கையில் இன்னும் 52 பேர் தான் ‎என்று சொல்கின்றனர்.‎

முரண் ஏழு: ‎

இந்த விபரங்களை இது வரை இணைய தளத்தில் வெளியிடாமல் ‎எவ்வித விபரமும் இல்லாமல் அறிக்கையாக வெளியிட்டதும். ‎எவ்வளவு அடிச்சாலும் தாங்குவார்கள் என்பதால் ஜால்ரா தலைவருக்கு ‎பொய்யான தகவல்களைக் கொடுத்தது ஏன்? ‎

தமிழக முதல்வரின் அதிகாரத்தை தனது கையிலெடுத்து அறிவிப்பு ‎செய்த வாத்தியார் :‎

ம.ம.கட்சியின் இந்த சமுதாய துரோகம் எந்த அளவிற்கு விரிந்து ‎பரந்து செல்கின்றது என்றால், தமிழக அரசு முஸ்லிம்களுக்கு துரோகம் ‎இழைத்துவிட்டதாக நாம் போராட்டம் நடத்தினால், அதற்கு தமிழக ‎அரசு தானே பதில் சொல்ல வேண்டும். மாறாக, முந்திரிக்கொட்டை ‎போல முந்திக்கொண்டு ம.ம.கட்சியின் சட்டமன்ற ஜனாஸா திருவாய் ‎மலர்ந்து பதில் தருகின்றது என்பதை வைத்து இவர்கள் எத்தகைய ‎சமுதாய துரோகத்தையும் செய்ய தயங்கமாட்டார்கள் என்பது ‎உறுதியாகின்றது. ‎

தவ்ஹீத் ஜமாஅத்தின் போராட்டத்திற்குப் பிறகு 688 ‎மருத்துவர்களுக்கான பணி நியமனத்தில் 52 முஸ்லிம்களை தமிழக ‎அரசு நியமித்து விட்டதாக ஜால்ரா மன்னன் அறிக்கை ‎வெளியிடுகின்றார். ‎

‎52 முஸ்லிம்கள் ஒப்பந்த மருத்துவர்களாக பணியில் நியமிக்கப்பட்டால் ‎அந்த அரசாணையை தமிழக அரசாங்கமல்லவா வெளியிட வேண்டும்? ‎இந்த கூஜா தூக்கிகள் ஏன் வெளியிட்டார்கள்? சம்பந்தப்பட்ட துறையின் ‎இணையதளத்திலே கூட இந்தப் பட்டியல் இல்லாதபோது இவர்கள் ‎மட்டும் இந்தப் பட்டியலை வெளியிடுகின்றார்கள் என்றால் அதன் ‎மர்மம் என்ன? ‎

அப்படியானால், தமிழக முதல்வரின் அதிகாரத்தை தனது ‎கையிலெடுத்து அறிவிப்பு செய்து தமிழக முதல்வர் அந்தஸ்துக்கு இந்த ‎ஜனாஸா சென்றுவிட்டதா? ‎

மக்கள் நல்வாழ்வுத்துறை அமைச்சர் இந்தப் பட்டியலை தங்களிடம் ‎தந்ததாக இவர்கள் நமது காதில் பூச்சுற்றுகிறார்கள். ‎

இவர்கள் வெளியிட்ட பட்டியல் மக்கள் நல்வாழ்வுத்துறை அமைச்சர் ‎அளித்த பட்டியலாக இருக்குமேயானால், அதில் அரசாணை எண், ‎தமிழக அரசின் முத்திரையுடனனல்லவா இருக்க வேண்டும்.‎

சிறுகுழந்தைகள் கணக்கு நோட்டில் கிறுக்கி வைத்ததைப் போல ‎மேலும், கீழுமாக 52 பேர்களை எழுதிக் காண்பித்துவிட்டு இவர்களை ‎எல்லாம் தமிழக அரசுப் பணியில் நியமித்ததுள்ளது என்று நம்பவைத்து ‎மக்களை முட்டாள்களாக்கப் பார்க்கிறார்கள். 52 பேர் கொண்ட ‎பட்டியலில் உள்ள இவர்களை எல்லாம் என்றைக்கு தமிழக அரசு ‎பணியில் நியமித்தது என்பது குறித்த நியமன உத்தரவு ஆணையை ‎இவர்கள் வெளியிடத்தயாரா?‎
அவர்களை நியமித்த விஷயம் சம்பந்தப்பட்ட டாக்டர்களுக்குத் ‎தெரியுமா?‎
ஒரு பேச்சுக்கு 52 முஸ்லிம் மருத்துவர்கள் நியமிக்கப்பட்டது ‎உண்மையாக இருக்குமேயானால், அந்த நியமன உத்தரவுகளை இது ‎வரை வெளியிடாமல் இருட்டடிப்பு செய்தது ஏன்?‎
அதை தவ்ஹீத் ஜமாஅத் போராட்டம் நடத்திய பிறகுதான் வெளியிட ‎வேண்டுமா?‎
அப்படியானால், ஒவ்வொரு துறையிலும் நியமிக்கப்பட்ட ‎முஸ்லிம்களின் பெயர் பட்டியலை அரசாங்கத்திடமிருந்து ‎பெறுவதற்கும், அரசாங்கமே அதை வெளியிட வைப்பதற்கும் ‎ஒவ்வொரு முறையும் தவ்ஹீத் ஜமாஅத் போராட்டம் நடத்த ‎வேண்டும் என்று எதிர்பார்க்கின்றார்களா?‎

ஒரு பேச்சுக்கு 52 முஸ்லிம் மருத்துவர்கள் நியமிக்கப்பட்டது ‎உண்மையாக இருக்கும்பட்சத்தில் தவ்ஹீத் ஜமாஅத்தின் இந்த ‎வீரியமிக்க போராட்டத்திற்குப் பிறகுதானே அவர்களை அவசர ‎அவசரமாக நியமித்து கணக்கைச் சரிகட்டி அம்மாவின் மானத்தை ‎வாத்தியார் அவசர அவசரமாக அறிக்கைவிட்டு காப்பாற்றினார் என்பது ‎உண்மையாகி விடுமே! ‎

இந்த அடிப்படையில் பார்த்தாலும் தவ்ஹீத் ஜமாஅத்தின் போராட்டம் ‎வெற்றி பெற்று விட்டது.‎

இந்த நியமனத்தை டிஎன்பிஎஸ்ஸி செய்யவில்லை என்ற அடிப்படை ‎அறிவு கூட நமக்கு இல்லை என்கிறார் மெத்தப்படித்த வாத்தியார். ‎டிஎன்பிஎஸ்ஸிக்குத்தான் இதற்கான அதிகாரம் உள்ளது. ஆனால் சிறப்பு ‎அனுமதி பெற்றதன் அடிப்படையில்தான் இந்த அதிகாரம் மக்கள் ‎நல்வாழ்வுத்துறைக்கு வழங்கப்பட்டது. இதை அரசாங்கம் ‎தெளிவுபடுத்தாத போது டிஎன்பிஎஸ்ஸி செய்ததாகத்தான் யாரும் ‎நினைப்பார்கள். ‎

அரசாணையின் முக்கிய பகுதியின் தமிழாக்கம்:‎
‎

4. பொதுசுகாதாரம் மற்றும் நோய்தடுப்பு மருந்துத் துறை இயக்குநர், ‎இந்த 835 பணியிடங்களையும் (723பேர் MBBS படித்தவர்கள், 112 பணிகள் ‎முதுநிலை பட்டப் படிப்பு படித்தவர்கள்)விதி 10 (A) (1) யின்படி ‎சென்னை தொழிற் படிப்புக்கான வேலைவாய்ப்பு அலுவலகத்தில் ‎பெற்று நிரப்புவதற்கு அரசிடம் அனுமதி கோருகிறார்.‎
‎

5.அரசாங்க நிறுவனங்களில் உள்ள துணை ‎மருத்துவர்களுக்கான காலிப் பணியிடங்களை வைத்திருப்பது ‎சுகாதாரத்தை மக்களுக்கு கொண்டு சேர்ப்பதில் பின்னடைவை ‎ஏற்படுத்தும், குறிப்பாக கிராமப்புறங்களில் பின்னடைவை ஏற்படுத்தும். ‎TNPSC மூலமாக மருத்துவ அதிகாரிகளை நியமிக்கும் பொதுவான ‎முறை இந்நேரத்தில் அதிகபயனளிக்காது, அது அதிக நேரம் ‎எடுக்ககூடியதாக உள்ளது.‎
‎

6. எனவே, இந்தச் சூழ்நிலையை கருத்தில் கொண்டு பொது சுகாதாரம் ‎மற்றும் நோய் தடுப்பு மருந்துத் துறை இயக்குநரின் கோரிக்கையை ‎அரசு ஏற்கிறது. எனவே மேற்கூறப்பட்டுள்ள 835 இடங்களையும் ‎தற்காலிகமாக நியமிக்க

10 (A) (1) விதியை பயன்படுத்தி ‎தொழிற்படிப்புகளுக்கான வேலைவாய்ப்புஅலுவலகத்தின் மூலமாக ‎நியமிக்க தற்போது உள்ள விதிகளை ஆளுநர் தளர்த்துகிறார். இந்த ‎நியமனம் கீழ்க்கண்ட விதிகளுக்குட்பட்டது.‎
‎ அ) இந்த தற்காலிக நியமனம் பணி நிரந்தரத்திற்கான எந்த ‎உரிமையும் வழங்காது
‎ ஆ) முறையாக இந்த இடங்கள் பூர்த்தி செய்யப்படும் போது ‎இவ்வாறு தற்காலிகமாக நியமனம் செய்யப்பட்டுள்ள அதிகாரிகள் ‎நீக்கப்படுவார்கள்.‎

உங்கள் பில்டப்புக்கும், புளுகு மூட்டைக்கும் ஓர் அளவே இல்லையா?:‎
பில்டப்புகளைக் கொடுப்பதிலும், புளுகு மூட்டைகளை அவிழ்த்து ‎விடுவதிலும் இவர்களை மிஞ்ச ஆளில்லை என்று சொல்லும் ‎அளவிற்கு இவர்கள் ஒவ்வொன்றாக அவிழ்த்துவிட்டுக் கொண்டே ‎இருப்பார்கள். அதில் ஓர் அல்வாதான், “அமைச்சர் எங்கள் ‎பாக்கெட்டுக்குள்” என்ற புரூடா.‎

இந்த பிரச்சனையை தாங்கள் கத்தார் நாட்டிலிருந்த போது தெரிய ‎வந்ததாகவும், உடனே மக்கள் நல்வாழ்வுத் துறை அமைச்சர் டாக்டர் ‎விஜயிடம் தொலைபேசியில்
தொடர்புக் கொண்டு கேட்ட போது, “அப்படி இருக்க வாய்ப்பில்லை” ‎என்றும், “நான் புதுக்கோட்டை தேர்தல் பிரச்சாரத்தில் இருக்கிறேன்; ‎சென்னைக்குத்தான் வந்ததும் சம்பந்தப்பட்ட துறையிடம் விசாரித்து ‎தகவல் சொல்கிறேன்” என்றும் கூறினாராம்.‎

கசப்பான உண்மை :‎

அமைச்சரை பாக்கெட்டில் வைத்திருப்பதாக பில்டப் கொடுக்கும் ‎இவர்கள் முக்கியமான புதுக்கோட்டை இடைத்தேர்தல் பிரச்சாரத்திற்கு ‎வராமல் கத்தார் நாட்டுக்கு சென்றது ஏன்?‎

இவர்களின் ஆதரவை அதிமுக பெற விரும்பவில்லை என்பதால்தான் ‎கத்தார்க்கு எஸ்கேப் ஆகி மானம் காத்தார்கள் என்பதுதான் கசப்பான ‎உண்மை.‎

இப்படி கத்தாரிலிருந்து மக்கள் நல்வாழ்வுத்துறை அமைச்சரை தொடர்பு ‎கொண்ட போது, மேற்கண்டவாறு சொல்லியிருப்பாரேயானால், ‎பிரச்சனை பற்றியும், தவ்ஹீத் ஜமாஅத்தின் போராட்டம் பற்றியும் ‎தெரிந்தவுடன், மருத்துவர் தேர்வாணையத்தைக் கண்டித்து ம.ம.க. ‎சார்பாக கண்டன அறிக்கையை வெளியிட்டது ஏன்?‎
இவர்களது பொதுச்செயலாளர் அப்துல் சமது வெளியிட்ட கண்டன ‎அறிக்கையே காட்டுகின்றது இவர்கள் அமைச்சரிடம் தொலைபேசியில் ‎பேசியதாக விடும் புருடா பொய்யானது என்று. அப்படி இவர்கள் ‎அமைச்சரிடம் தொலைபேசியில் பேசியிருந்தால் முஸ்லிம்களுக்கு ‎துரோகம் இழைக்கப்பட்டதாக சொல்லி அதைக் கண்டித்து அறிக்கை ‎வெளியிட்டிருக்கமாட்டார்கள்.‎

மேலும், புதுக்கோட்டை தேர்தல் பிரச்சாரத்திலிருந்து அமைச்சர் ‎திரும்பிய பிறகு எழுத்துப்பூர்வமாக பதிலளிப்பதாக சொன்னார் ‎என்றும் புருடா விட்டிருந்தார்கள். இதுவரை அமைச்சர் வெளியிட்ட ‎அரசாணையை இவர்கள் வெளியிடவில்லை. அமைச்சரும் அரசு ‎சார்பில் இது குறித்து எந்த விளக்கத்தையும் வெளியிடவில்லை.‎
பாவம்! இன்னும் அமைச்சர் புதுக்கோட்டை இடைத்தேர்தலுக்காக ‎பிரச்சாரம் செய்து கொண்டுள்ளார் போலும்.‎

உலகமகா மெகா காமெடி :‎
இதில் கடைசியாக வாத்தியார் அடித்துள்ள காமெடிதான் உலகமகா ‎மெகா காமெடி. அந்த காமெடி இதோ :‎
‎“முஸ்லிம்களுக்கான இடஒதுக்கீடு எவ்வாறு பின்பற்றப்படுகின்றது ‎என்பதை தமிழ்நாடு முஸ்லிம் முன்னேறற்றக் கழகம் தொடர்ந்து ‎கண்காணித்து வரும். இதில் துரோகம் இழைக்க அனுமதிக்க ‎மாட்டோம். ஆனால் ஆய்வு செய்யாமல் மலிவான விளம்பரத்தில் ‎ஈடுபட மாட்டோம் என்பதற்கு இது ஒரு எடுத்துக் காட்டாகும்” என்று ‎கூறி மிகப்பெரிய காமெடி பண்ணியுள்ளது இந்த ஜனாஸா. ‎

முஸ்லிம்களுக்கான இடஒதுக்கீடு எவ்வாறு பின்பற்றப்படுகின்றது ‎என்பதை தமிழ்நாடு முஸ்லிம் முன்னேறற்றக் கழகம் தொடர்ந்து ‎கண்காணித்து வருகின்றதாம். ‎

என்னே அருமையான கண்காணிப்பு?‎

இவர்கள் கண்காணித்த கண்காணிப்பின் லட்சணத்தைத்தான் கடந்த ‎திமுக ஆட்சியில் கண்கூடாகக் கண்டோமே!‎
திமுகவிற்கு கடந்த ஆட்சியில் அடிமைச் சேவகம் எழுதிக் ‎கொடுத்துவிட்டு, அரசு அதிகாரிகள் முஸ்லிம்களுக்கு இடஒதுக்கீட்டை ‎சரியான முறையில் வழாங்காமல் துரோகமிழைத்த போது, ரோஸ்டர் ‎முறை என்று கூறி இந்த வாத்தியார் அதை கவனமாகக் கவனித்து ‎கண்காணித்த லட்சணம்தான் அனைவருக்கும் தெரியுமே!‎
‎”சம்பந்தப்பட்ட அதிகாரிகள் துரோகமிழைத்து விட்டார்கள்; ‎முஸ்லிம்களுக்கு இடஒதுக்கீடு விஷயத்தில் இழைக்கப்பட்ட அநீதி ‎சரிசெய்யப்படும்” என்று அப்போதைய முதல்வர் கருணாநிதியே ஒப்புக் ‎கொண்ட போதும், இவர்கள் அதை ஒப்புக் கொண்டபாடில்லை. ‎அப்போது அது ரோஸ்டர் முறை – பூஸ்டர் முறை என்று முட்டுக் ‎கொடுத்து சமுதாய துரோகம் செய்து, “தாங்கள்தான் நம்பர் ஒன் – ‎சமுதாய துரோகிகள்” என்பதை வெளிச்சம் போட்டுக் காட்டினர். ‎
இப்படி சென்ற ஆட்சியில், “ஐயா”வுக்கு கூஜா தூக்கி, கண்காணித்த ‎கண்காணிப்பின் லட்சணத்தைத்தான் சென்ற ஆட்சியில் கண்டோமே! ‎இதுதான் இவர்கள் தொடர்ந்து கண்காணித்து வரும் லட்சணமாம்!!‎

இந்த கேவலப்பட்ட பிழைப்பு இவர்களுக்கு ஒன்றும் புதிதல்ல: ‎
எனவே முஸ்லிம்களுக்கு இட ஒதுக்கீட்டில் அநீதி இழைக்கப்படும் ‎போது முஸ்லிம்களுக்கு அநீதி இழைக்கப்படவில்லை என ஆளும் ‎கட்சிக்கு ஆதரவாக, ஜால்ரா தட்டுவதும், கூஜா தூக்குவதும், அடிமைச் ‎சேவகம் செய்வதும் வாத்தியாருக்கும், தமுமுகவிற்கும் ஒன்றும் ‎புதிதல்ல. அவர்களது பிழைப்பே அதுதான். வழக்கமாக தொன்று ‎தொட்டு இதையே ஒரு வேலையாக இவர்கள் செய்து வருவதால் இது ‎அவர்களுக்கு கைவந்த கலையாக ஆகிவிட்டது.‎

இதற்கெல்லாம் காரணம் ஜெயலலிதா கையில் வைத்திருக்கும் ‎எஞ்சியுள்ள எலும்புத்துண்டான வாரியப்பதவி எனும் எலும்புத்துண்டின் ‎மகிமைதான். ‎
வாத்தியார் சொல்வது உண்மை என்று வைத்துக் கொண்டாலும் ‎முஸ்லிம்களுக்கு பேராபத்தை ஏற்படுத்தும் வேலையைத்தான் மானம் ‎கெட்ட வாத்தியார் செய்து வருகின்றார்.‎
தமிழக அரசாங்கம் – பணி நியமனம் சம்மந்தமாக ஒரு அறிவிப்பை ‎வெளியிடுகின்றது. அதில் முஸ்லிம்கள் இல்லை. அதிகாரிகளிடம் ‎கேட்டால் வேறு ஒரு கணக்கைக் காட்டி இட ஒதுக்கீடெல்லாம் ‎கொடுத்தாகிவிட்டது என சொல்கின்றனர். எனவே இடஒதுக்கீட்டில் ‎அநீதி இல்லை என நம்மை தமுமுக நம்பச் சொல்கின்றது. ‎
இதை அறிவுள்ள எவனும் ஏற்க மாட்டான். ஏனெனில் இந்தக் ‎காரணத்தை எல்லா பணி நியமனங்களுக்கும் சொல்லலாம். எனவே ‎எப்போதெல்லாம், முஸ்லிம்கள் புறக்கணிக்கப்படுகின்றார்களோ, ‎அப்போதெல்லாம், “அரசு ஏற்கனவே இதற்கு முஸ்லிம்களை ‎வேலைக்குப் பணி அமர்த்தி இருக்கும், அதிகாரிகள் அந்த ‎அறிவிப்புகளை வெளியிடாமல் மறந்து இருக்கலாம், எனவே ‎முஸ்லிம்கள் புறக்கணிக்கப்படவில்லை” என முஸ்லிம்கள் நம்ப ‎வேண்டும் என மமக சொல்கின்றது.‎

எனவே எந்தப் பணி நியமனத்திலும் நாம் இட ஒதுக்கீட்டைப் பார்க்கக் ‎கூடாது. நம்பிக்கையின் அடிப்படையில் இட ஒதுக்கீடு ‎வழங்கப்பட்டிருக்கும் என நாமாக நினைத்துக் கொள்ள ‎வேண்டும்.இதைத் தான் மம கட்சி சொல்கின்றது.‎
‎ ‎
இவ்வளவு விழிப்புடன் இருக்கும் போதே அரசு அதிகாரிகள் ‎முஸ்லிம்களை ஏமாற்றுகின்றார்கள். நம்பிக்கையின் அடிப்படையில் ‎அதிகாரிகளை நம்ப வேண்டும் என தமுமுக கருத்தை ஏற்றுக் ‎கொண்டால் அவ்வளவுதான். முஸ்லிம்களில் ஒருவருக்குக் கூட அரசு ‎வேலை கிடைக்காது. எனவே தமுமுகவின் தற்போதைய அறிக்கை ‎இட ஒதுக்கீட்டில் முஸ்லிம்களுக்கு அநீதி இழைக்கப்படுவதை ‎ஊக்குவிப்பதாகவே உள்ளது.‎
எனவே இந்த சமுதாய துரோகிகளை இனம் காண்போம்!!‎

http://www.tntj.net/92491.html